भारतमा पुनः बढ्न थाल्यो कोरोना संक्रमणदर

बैशाख २, काठमाडौं । छिमेकी मुलुक भारतमा पछिल्लो दिनहरुमा पुनः कोरोना संक्रमणदर बढ्दै गएको छ । यसरी दिनहुँ रुपमा कोरोना संक्रमणदर बढिरहेको हुँदा कोरोना महामारीको चौथो लहर सुरु हुन लागेको अनुमान गर्न थालिएको छ ।
भारतका कुल ७३४ जिल्ला मध्ये हाल २९ जिल्लामा कोरोना पोजेटिभ हुनेको दर ५ प्रतिशतभन्दा बढी रहेको छ भने २३ जिल्लामा १० प्रतिशतभन्दा बढी र ८ जिल्लामा २० प्रतिशतभन्दा बढी रहेको छ ।
विश्व स्वास्थ्य संगठनका अनुसार कुनैपनि निश्चित क्षेत्रमा ५ प्रतिशतभन्दा बढीको संक्रमणदरलाई चिन्ताजनक अवस्थाको रुपमा लिने गरिन्छ । भारतका स्थानिय सञ्चार माध्यमका अनुसार भारतमा पछिल्लो दुई दिनमा मात्र १ हजारभन्दा बढी संक्रमित थपिएका छन् ।
कोरोना संक्रमणदर बढ्दै गए पछि भारतमा आगामी महिना संचालन हुने भनिएको सिबीएसईको परिक्षासमेत सर्न सक्ने बताइएको छ भने नयाँ दिल्लीस्थित केही विद्यालयहरु पुनः बन्द भएका छन् ।
भारतमा हालसम्म ४ करोड ३० लाख मानिस कोरोना संक्रमित भएका छन् भने ५ लाख छ हजार मानिसले कोरोना संक्रमणको कारण ज्यान गुमाएका छन् ।