कार्तिक २९, काठमाडौं । सवारी चालक अनुमतिपत्र (लाईसेन्स)का लागि आवेदन बुझाएर परीक्षाको प्रतिक्षामा बस्नेको संख्या ६ लाख पुगेको छ । कोभिड–१९ का कारण लामो समयदेखि बन्द रहेको आवेदन लिने काम गत कात्तिक ८ मा खुलाएपछि झन्डै चार लाखले आवेदन बुझाएका छन् ।
पहिले नै आवेदन बुझाएर परीक्षाको प्रतीक्षामा बस्नेको संख्या दुई लाख भएको यातायात व्यवस्था विभागले जनाएको छ ।
६ महिनापछि कात्तिकको दोस्रो साता आवेदन पुनः खुलाइएको भए पनि प्राविधिक कारणले बीचमा झण्डै चार दिन अवरुद्ध भएको थियो । एकैपटक धेरै सेवाग्राहीले आवेदन भर्न खोज्दा समस्या आएको विभागका प्रवक्ता डा लोकनाथ भुसालले बताए ।