चैत १६, काठमाडौं । विश्वमा महामारीको रुपमा फैलिएको कोरोना भाइरसबाट युरोपेली मुलुक इटाली सबैभन्दा बढी प्रभावित भएको छ । इटालीमा यो रोगका संक्रमितहरु ९२ हजार पुगेका छन् भने यस रोगबाट मर्नेको संख्या १० हजार बढी भइसकेको छ । फेब्रुअरी १६ मा जम्मा दुई जनामा देखिएको यो भाइरस यतिछिटो फैलियो कि त्यसबाट इटाली अस्तव्यस्त नै हुनपुगेको छ ।
इटालीको यो अवस्था प्रत्यक्ष देखेका र इटालीमै बसोबास गर्ने नेपालीहरुले इटाली सरकारले बेलैमा कोरोना भाइरस विरुद्ध अभियान चाल्न नसकेको र सरकारले जुन बेला रोकथामका निम्ति कदम चाल्यो, उक्त कमदप्रति नागरिकहरुले बेवास्ता गरेकै कारण इटालीले यो महामारीमा ठूलो क्षति भोग्नुपरेको त्यहाँ बसोबास गर्ने नेपालीहरुले बताउन थालेका छन् । उनीहरु एकसाथ भन्छन् यहाँ जस्तो गल्ती नेपालमा नहोस् ।
यहाँको घटनाबाट पाठ सिकेर नेपाल र नेपाली जनताले सचेतना अपनाउन आवश्यक रहेको इटालीको मान्तोवामा बस्ने महेन्द्रनगरकी गोमा खरेलले बताउनु भयो । त्यसैगरी चितवन घर भएका र इटालीको लेनियानोमा बस्ने विजय भुसाल र भारजी इटालीमा बस्ने बुटवलका बाबुराम श्रेष्ठले नेपालीहरुलाई सतर्क रहन र निश्चित अवधि एकान्तवास बस्न विशेष आग्रह गर्नुभएको छ । यसले कोरोना भाइरस संक्रमणबाट आफू र आफ्नो परिवार मात्रै होइन सिंगो नेपाली जनता नै जोगिन सक्ने भएकाले सचेत रहन र केही समयका लागि घरबाहिर ननिस्कन आग्रह गरेका छन् ।
