काठमाडौं, १३ फागुन । रुस सरकारले लोकप्रिय रुसी विपक्षी नेता अलेक्सी नभाल्नीको शव उनकी आमालाई दिइएको छ । रुसी राष्ट्रपति भ्लादिमिर पुटिनका कट्टर आलोचक नाभाल्नीको एक हप्ताअघि कारागारमै मृत्यु भएपछि नभाल्नीको अन्त्येष्टि गोप्य रुपमा गर्ने सर्तमा शव आमालाई हस्तान्तरण गरिएको छ ।
नाभाल्नीको अन्तिम संस्कार गोप्य ढंगले गर्न उनकी आमालाई मनाइएको र त्यही सर्तमा शव दिइएको दाबी गरिएको छ । उनकी आमा लुडमिला गत हप्तादेखि नै छोराको शव पाउने प्रतीक्षामा कारागार नजिकै बसेकी थिइन् ।
नाभाल्नीको मृत्युको प्रमाणपत्रमा मृत्युको कारण प्राकृतिक लेखिएको छ । त्यसमा उनकी आमा ल्युदमियाले हस्ताक्षर गरेपछि मात्र शव जिम्मा लगाइएको हो ।
नाभाल्नीका प्रवक्ताले भनेका छन् गोप्य ढंगले अन्त्येष्टि नगरेमा शव जेलभित्रै गाड्ने भनिएको थियो । नभाल्नीको फेब्रुअरी १६ मा उत्तरी रुसको कारागारमा रहस्यमय मृत्यु भएको थियो । उनको मृत्युलाई लिएर अमेरिकासहित युरोपेली मुलुकले रुसको कडा आलोचना गरिरहेका छन् ।
